Kryeministri britanik Keir Starmer nuk dha ndonjë sinjal pas bisedimeve me shefin e Shtëpisë së Bardhë, Joe Biden se kërkesa e Ukrainës për t`u lejuar të përdorë armë me rreze të gjatë veprimi në thellësi të Rusisë, do të plotësohej. I pyetur nëse e kishte bindur Bidenin t`i lejohej Kievit lëshimi i raketave "Storm Shadoë" në Rusi, Sir Keir u shpreh vetëm se ata kishin pasur "një diskutim të gjatë dhe produktiv në një numër frontesh, duke përfshirë Ukrainën, siç mund ta prisnit, Lindjen e Mesme, dhe rajonin e Indo-Paqësorit”. Shtëpia e Bardhë nga ana tjeter pohoi se ata gjithashtu kishin shprehur "shqetësim të thellë për ofrimin e armëve vdekjeprurëse nga Irani dhe Koreja e Veriut për Rusinë". Më herët presidenti rus Vladimir Putin paralajmëroi vendet perëndimore që të mos lejonin Ukrainën të lëshojë raketa me rreze të gjatë veprimi ndaj Rusisë. Një gjë e tillë, tha ai, do t`i vendosë në konflikt të drejtpërdrejtë me Moskën. Shtetet e Bashkuara, të shqetësuara për çdo hap që mund të përshkallëzojë konfliktin, janë treguar të matura më parë para se t’u përgjigjeshin kërkesave të Ukrainës për armë të caktuara, përfshirë tanke të avancuara, raketa dhe sisteme raketash dhe avionë luftarakë F-16. Deri tani, SHBA e ka lejuar Ukrainën të përdorë armë të dërguara nga Amerika vetëm në një zonë të kufizuar brenda kufirit të Rusisë me Ukrainën. Starmer pohoi se bisedimet për këtë çështje do të vazhdojnë kur udhëheqësit globalë të mblidhen për mbledhjen vjetore të Asamblesë së Përgjithshme të OKB-së këtë muaj. Presidenti ukrainas Volodymyr Zelenskyy u ka bërë trysni udhëheqësve ushtarakë amerikanë dhe aleatëve që të shkojnë shumë më tej. Ai argumenton se Shtetet e Bashkuara duhet t’i lejojnë Ukrainës të godasë bazat ajrore ruse nga ku fillohen sulmet pranë kufirit, pasi Rusia ka shtuar sulmet ndaj rrjetit energjitik të Ukrainës dhe shërbimeve, teksa po afron stina e dimrit."