Lezha ka nisur përgatitjet për sezonin turistik, i cili pritet të hapet zyrtarisht në fund të muajit maj, me fokus të qartë te pastërtia dhe menaxhimi i mbetjeve në zonat bregdetare. Në një takim me operatorët turistikë në Shëngjin dhe Tale, kryetari i Bashkisë Lezhë, Pjerin Ndreu, theksoi se këtë sezon nuk do të ketë kosha mbeturinash në hapësirat publike, por grumbullimi do të bëhet sipas një orari të përcaktuar. Ai paralajmëroi masa të forta ndëshkimore për çdo subjekt apo individ që nuk respekton rregullat e vendosura për pastërtinë, duke përfshirë edhe ndjekje penale në rastet e ndotjes së qëllimshme të mjedisit. Në vitet e fundit, Shëngjin dhe Tale kanë shënuar rritje të ndjeshme të numrit të vizitorëve, çka e bën edhe më të domosdoshëm zbatimin rigoroz të rregullave për një mjedis të pastër dhe të menaxhuar siç duhet.