Izraeli dhe Hamasi kundërshtuan thirrjet ndërkombëtare për të rinovuar armëpushimin, afati i së cilës përfundoi të shtunën, ndërsa sulmet ajrore goditën objektivat e militantëve në Gaza dhe grupet palestineze lëshuan breshëri raketash. Tymi mbuloi përsëri qiellin mbi veriun e territorit palestinez, qeveria e Hamasit tha se 240 njerëz ishin vrarë që nga rifillimi i luftimeve. Në Izrael, Komanda e Frontit të Brendshëm të ushtrisë raportoi 40 alarme raketash në jug dhe në qendër të vendit, dhe grupet palestineze Hamasi dhe Xhihadi Islamik njoftuan "breshëri raketash" kundër tre komunave izraelite pranë Gazës. Sipas Kombeve të Bashkuara, rreth 1.7 milionë njerëz në Gaza, rreth 80 për qind e popullsisë, janë zhvendosur nga tetë javët e luftës. Popullsisë i mungon ushqimi, uji dhe gjërat e tjera të domosdoshme dhe shumë shtëpi janë shkatërruar. Agjencitë e OKB-së kanë shpallur një katastrofë humanitare, megjithëse disa kamionë ndihma arritën të shtunën. Sot kamionët me ndihma janë lejuar të hyjnë sërish në Gaza nga Egjipti, pas një dite në të cilën nuk u dërguan furnizime në territor. Të dyja palët fajësuan njëra-tjetrën për prishjen e armëpushimit, e cila kishte mundësuar lirimin e 80 pengjeve izraelitë në këmbim të 240 të burgosurve palestinezë. Pamjet: AFP