Drejtori i Zyrës për Kosovën në Qeverinë e Serbisë, Petar Petkoviç iu përgjigj menjëherë deklaratave të kryeministrit të Kosovës Albin Kurti se Serbia po planifikonte sulme të reja kundër Kosovës. Përmes një konference të jashtëzakonshme, Petkoviç i cilësoi gënjeshtra absurde deklaratat e Kurtit. Sipas tij, kryeministri i Kosovës po synon të krijojë kriza që të largojë vëmendjen nga gjendja e keqe ekonomike në Kosovë. “Nuk ka stërvitje në terrene, kjo është një mënyrë e Kurtit për të shmangur detyrimet që ka në dialog, sepse tani kemi ardhur në momentin që të flasim për hapa konkretë, për formimin e Asociacionit”, tha Petkoviç. Edhe ministria e Mbrojtjes së Serbisë ka mohuar stërvitjet në poligone ushtarake të pjesëtarëve të grupit që sulmuan Policinë e Kosovës në Banjskë të Zveçanit më 24 shtator, sic pretendohet nga zyrtarët e Kosovës “Është gënjeshtër dhe absurditet i plotë që terrenet stërvitore të Forcave të Armatosura të Serbisë po përdoren për stërvitjet e ndonjë njësie, me përjashtim të njësive të Forcave të Armatosura të Serbisë dhe herë pas here edhe të Ministrisë së Punëve të Brendshme”, tha kjo ministri, duke hedhur poshtë po ashtu se ka plane për sulme në territorin e Kosovës. Pak pasi kryeministri Albin Kurti paralajmëroi se Rajdojçiç po përgatit sulme të reja kundër Kosovës, misioni i KFOR-it në Kosovë është vënë në lëvizje dhe ka nisur patrullimin në terren. KFOR madje ka publikuar fotografi të ushtarëve amerikanë duke patrulluar në afërsi të Leposaviçit, duke theksuar se është e fokusuar plotësisht për të ofruar një ambient të qetë dhe të sigurt për të gjithë ata që jetojnë në Kosovë. Pamjet: AFP