Serbia ka lënë të lirë zëvendës drejtorin e Policisë së Kosovës. Lajmi u konfirmua të enjten në mbrëmje nga ministria e Jashtme e Kosovës që njoftoi se Dejan Jankoviç, i arrestuar pardje në Serbi, tashmë është liruar dhe është rrugës për Kosovës. Më herët Departamenti amerikan i Shtetit kërkoi lirimin e menjëhershëm tij. Në një reagim të ashpër ndaj Serbisë, dash i bën thirrje Beogradit zyrtar që të vetëpërmbahej nga veprimet e njëanshme dhe të pakoordinuara. DASH u bëri thirrje autoriteteve serbe të veprojnë me transparencë dhe në përputhje të plotë me ligjin në lidhje me qytetarët kosovarë të ndaluar në Serbi të mërkurën. “Ndalimet arbitrare apo padrejtësisht të gjata, posaçërisht nëse shënjestër e tyre janë oficerët e Policisë së Kosovës, do të shihen si veprime përshkallëzuese që dëmtojnë paqen dhe stabilitetin", tha një zëdhënës i Departamentit të Shtetit. Sipas autoriteteve kosovare, Serbia ndaloi mbi 1.400 kosovarë, teksa po kalonin transit nëpër Serbi. Kosova ka akuzuar Serbinë se me veprimet e fundit ka kryer shkelje të rëndë të të drejtave të njeriut dhe ka cenuar marrëveshjet e arritura në dialog, që ndërmjetësohet nga Bashkimi Evropian.