Serbia dhe kompania izraelite e mbrojtjes Elbit Systems planifikojnë krijimin e një kompanie të përbashkët për prodhimin e dronëve luftarakë. Presidenti serb Aleksandar Vuçic deklaroi se Serbia do të ketë 50 për qind të pronësisë dhe se prodhimi pritet të zhvillohet në Beograd. Në qendër të projektit është droni LANIUS-X, një sistem i avancuar zbulimi dhe sulmi, i pajisur me sensorë, navigim autonom dhe teknologji për njohjen e mjedisit. Vuçic e ka përshkruar mjetin fluturues pa pilot si një dron që mund të gjurmojë dhe të ndjekë me saktësi objektivat, ndërsa çmimi i një njësie pritet të jetë rreth 30 mijë euro. Shumë detaje të marrëveshjes mbeten megjithatë të paqarta. Kompania e përbashkët ende nuk është regjistruar, thotë REL, ndërsa autoritetet serbe dhe Elbit Systems nuk kanë dhënë informacione të hollësishme për financimin, kapacitetet dhe vendndodhjen e fabrikës. Bashkëpunimi po zhvillohet në një kohë kur Elbit Systems përballet me kritika ndërkombëtare për përdorimin e teknologjisë së saj në konfliktin në Gaza. Në vitin 2025, NATO e pezulloi përkohësisht kompaninë nga tenderët e rinj, në kuadër të një hetimi që, sipas raportimeve mediatike, lidhej me dyshime për korrupsion. Serbia ndërkohë e ka thelluar ndjeshëm bashkëpunimin ushtarak me Izraelin. Ajo ka blerë sisteme të avancuara izraelite, përfshirë dronë, artileri dhe radarë, ndërsa në vitin 2026 dy vendet nënshkruan edhe marrëveshje për mbrojtjen dhe shkëmbimin e të dhënave të klasifikuara.