Aksioni i Policisë së Kosovës në Veri për mbylljen e gjashtë njësive të Bankës Postare Kursimore të Serbisë është dënuar nga Beogradi. Kryeministri i Serbisë, Millosh Vuçeviç, e cilësoi aksionin si “akt barbar që drejtpërdrejt kërcënon mbijetesën e popullit serb” në Kosovë. Përmes një statusi në X, ai shprehet se “Kë po pengon Banka Postare Kursimore? Serbët në Kosovë janë komuniteti i vetëm në Evropë që nuk mund të operojnë normalisht. A kanë të drejtë ata që të kenë paga dhe pensione? Apo asgjë nuk u lejohet”. Në një reagim edhe ministri i Brendshëm i Serbisë, Ivica Daçiç, tha se aksioni është pjesë e terrorit që kryeministri i Kosovës, Albin Kurti po o bën popullsisë serbe në veri, duke shtuar se këto akte çojnë në konflikte të reja në Ballkan”. Zyra për Kosovën në Qeverinë serbe pretendoi gjithashtu se gjatë aksionit, Policia e Kosovës ka “keqtrajtuar” punonjësit e institucioneve serbe. Aksioni i autoriteteve të Kosovës erdhi një javë pasi Banka Qendrore e Kosovës njoftoi se ka përfunduar afati tranzitor për rregulloren e saj, që ndalon përdorimin e dinarit serb për kryerjen e pagesave, duke e zëvendësuar me euron.