Serbia celi një kapitull të ri në negociatat e anëtarësimit në Bashkimin Europian. Në konferencën ndërqeveritare, u hap kapitulli i i katërt, që ka të bëjë me politikën e transportit, energjisë, rrjeteve trans-europiane, mbrojtjen e ambientit dhe ndryshimet klimatike. Duke folur në emër të BE-së, Sekretari slloven i shtetit, Gasper Dovzhan, e cilësoi këtë hap si sukses të Presidencës sllovene, hap i cili do të ndikojë në dinamiken e procesit negociator. Ai tha megjithatë se pavarësisht përparimit të shënuar, Serbia duhet të bëj më shumë në reformat e sistemit të drejtësisë, luftës kundër krimit të organizuar dhe korrupsionit si dhe në proceset e brendshme të rasteve të krimeve të luftës. Prej saj është kërkuar që të ketë rol konstruktiv edhe në dialogun me Kosovën e kjo “do të përcaktojë dinamiken e negociatave të anëtarësimit”. Komisioneri i zgjerimit, Oliver Varhelyi e cilësoi hapjen e katër kapitujve në negociatat me Serbinë si “sinjal të rëndësishëm jo vetëm për këtë vend, por edhe për gjithë rajonin e Ballkanit Perëndimor”. Kryeministrja serbe, Ana Bërnabic u shpreh se vendi i saj pret së shpejti hapjen e kapitujve të tjerë. Ajo paralajmëroi investime të mëdha të Serbisë në fushën e ruajtjes së mjedisit, një prej temave të përfshira në kapitujt e celur së fundi. Serbia tani rezulton të ketë hapur 22 nga 35 kapituj në procesin e negociatave me bllokun europian.