Në Mitrovicë të Veriut, para spitalit, punonjësit shëndetësor nga katër komunat veriore të Kosovës protestuan të premten. Ata kundërshtuan një aksion të Policisë së Kosovës që u zhvillua mbrëmjen e së enjtes nën dyshimin për armë në hapësirat e Spitalit të Mitrovicës së Veriut dhe qendrën e mjekësisë atje. Protestuesit mbanin në duar pankartat me kërkesat e tyre si “Duart larg spitalit”, “Evropë, mbroji të drejtat tona” dhe “Shëndetësia dhe arsimi janë të drejta themelore të njeriut”. Ndërkohë para protestuesve foli, Zllatan Ellek, kryetari i Listës Serbe që është edhe drejtues i Spitalit të Mitrovicës së Veriut. Ai tha se do të kundërshtojnë integrimin e shëndetësisë dhe arsimit në sistemin e Kosovës. “Është koha të kalojmë nga fjalët në vepra, dhe të drejtat e të gjithëve janë të qarta, dhe nga këtu po dërgojmë një mesazh se kemi të drejtat tona dhe se nuk do të integrohemi në sistemin e Kosovës” Ellek mes tjerash u ka bërë thirrje EULEX-it dhe KFOR-it t’i vendosin pjesëtarët e tyre para shkollave e spitaleve në veri të vendit. Në Kosovë, në të gjitha komunat me shumicë serbe, shkollat dhe spitalet funskionojnë me sistemin e Serbisë. Mbrëmjen e së enjten, përmes një video mesazhi, kryeministri në detyrë i Kosovës, Albin Kurti iu ka adresuar qytetarëve serbë, ku bëri të ditur se synohet inkorporimi në një sistem i shëndetësisë dhe arsimit. “Sigurisht, dualizmi i sistemit shëndetësor dhe arsimor nuk është i qëndrueshëm. Është i nevojshëm inkorporimi i tyre dhe unifikimi. Këtë nuk dua ta bëj kundër jush apo pa ju. Gjatë mandatit tonë të ardhshëm, bashkë me të gjithë, përfshirë edhe kryetarët e ardhshëm të komunave, do të punojmë për inkorporimin e shëndetësisë dhe arsimit në një sistem të vetëm”. Kundër integrimit të spitaleve dhe shkollave në sistemin e Kosovës ka dalë edhe Lista Serbe që thanë se arsimi dhe shëndetësia janë shtyllat e popullit serbë dhe se do mbesin të tilla. Për mundësinë e integrimit të institucioneve serbe në sistemin e Kosovës, pati reaguar në fillim të shtatorit edhe e ngarkuara me punë e Ambasadës së SHBA-ve në Kosovë, Anu Pratipatti. Ajo kishte thënë se të duhej të ndodhte një ditë, por vetëm në konsultim me komunitetin serb.