Sekretarja e shtypit e presidentit amerikan Donald Trump, Karoline Leavitt do të largohet nga detyra në Shtëpinë e Bardhë në fund të këtij muaji. Lajmin e ka bërë të ditur vetë Trump, i cili e cilësoi Leavitt si “një nga bashkëpunëtoret e tij më të besuara”. Presidenti theksoi se vendimi i Leavitt, një nga zërat më të njohur të administratës aktuale, tha se vendimi i saj lidhet me dëshirën për të kaluar më shumë kohë me dy fëmijët e saj të vegjël dhe familjen. Trump u shpreh se e kupton dhe e respekton plotësisht vendimin, duke shtuar se Leavitt do të vazhdojë të jetë një nga këshilltaret e tij kryesore edhe pas largimit nga detyra. Në një deklaratë të publikuar në platformën X, vetë 28 vjeçarja e përshkroi periudhën e saj në këtë post si aventurën “ e një jete, për të cilën ndihet e nderuar”. Ajo falënderoi bashkëpunëtorët në Shtëpinë e Bardhë dhe tha se mezi pret t’i mbështesë ata edhe gjatë dy viteve e gjysmë të ardhshme.Leavitt, e cila ishte rikthyer në detyrë në korrik pasi kishte sjellë në jetë fëmijën e dytë, e pranoi se nuk e kishte pasur të lehtë për ta hedhur këtë hap. Megjithatë, ajo theksoi se ky ishte vendimi më i mirë për familjen e saj. “Që kur u ktheva në Shtëpinë e Bardhë pas lindjes së vajzës sime, kam ndier në zemër se nuk mund të jem nëna më e mirë që meritojnë dy fëmijët e mi të vegjël, ndërkohë që i kushtoj kohën, energjinë dhe vëmendjen e vazhdueshme që kërkon posti i sekretares së shtypit të Shtëpisë së Bardhë”, shkroi ajo, ndërsa nenvizoi se do të vazhdojë të jetë “një mbështetëse e zëshme” e Partisë Republikane dhe e lëvizjes “Make America Great Again”.