Kancelari gjerman Olaf Scholz u shpreh të martën në Berlin kundër bilateralizimit të procesit të zgjerimit të BE. Në përgjigje të një pyetjeje për mosmarrëveshjet e fundit mes Greqisë dhe Shqipërisë, gjatë konferencës së shtypit me kryeministrin grek Kyriakos Micotaqis, Kancelari socialdemokrat theksoi se në të gjitha mosmarrëveshjet midis vendeve të rajonit, Berlini është në anën e procesit të anëtarësimit në BE, sepse dëshiron që kandidatët për anëtarësim ta arrijnë atë sa më shpejt. "Në të kaluarën, jam angazhuar shumë me vende të ndryshme për të siguruar që të mos ketë asnjë bilateralizimi që do të pengonte përparimin e këtij procesi dhe po punojmë që kjo të vazhdojë të jetë e mundur në të ardhmen." Më 11 nëntor Greqia vendosi të mos i bashkohet shteteve të tjera anëtare të BE-së për të plotësuar kërkesën e komisionit Evropian drejtuar Këshillit Evropian për hapjen e negociatave për tre grup-kapitujt e parë për Shqipërinë. Shkak për këtë është bërë mbajtja ende në burg e kryetarit të zgjedhur të Bashkisë së Himarës, Fredi Beleri, i arrestua dy ditë para zgjedhjeve lokale të 14 majit 2023 me akuzën për shit-blerje votash. Kryeministri grek Mitsotakis ka kërkuar që Fredi Beleri të betohet si kryebashkiak i Himarës, qoftë edhe nga qelia. Kjo çështje sipas Mitsotakis ka lënë në hije marrëdhëniet dypalëshe me Shqipërinë, duke 'kërcënuar' me pengesë ndaj integrimit të saj në BE. Pamjet: AFP