Kancelari gjerman Olaf Scholz e dënoi dhe e quajti të pamatur kërcënimin e kandidatit për president të SHBA-ve, Donald Trump, për të mos mbrojtur anëtarët e NATO-s që nuk shpenzojnë mjaftueshëm për mbrojtjen. “Më lejoni të them se çdo relativizim për garancinë kolektive të mbrojtjes së NATO-s është i papërgjegjshëm dhe i rrezikshëm dhe është vetëm në interesat e Rusisë”, deklaroi Scholz pas bisedimeve me kryeministrin polak Donald Tusk. Në konferencën e përbashkët që mbajti për shtyp me kryeministrin polak, kancelari gjerman thotë se solidariteti midis vendeve të NATO-s është "i domosdoshëm" dhe se mbrojtja e organizatës zbatohet "pa rezerva", duke vijuar të hedhë poshtë deklaratat e fundit të Donald Trump që kërcënonte se do të ndalonte mbrojtjen e vendeve të NATO-s nga Rusia nëse ato dështojnë të paguajnë për mbrojtjen e tyre . Deklaratat e Trump se do ta lejonte rusinë të bënte cfarë dreqi të donte me vendet që nuk paguajnë për mbrojtjen e tyre ngjallën mjaft reagime. Shtëpia e Bardhë kujtoi përpjekjet e qeverisë amerikane për të forcuar aleancat e saj në botë. "Inkurajimi për pushtim të aleatëve tanë më të ngushtë nga regjime vrastare është tronditës dhe i çmendur", tha zëdhënësi i Shtëpisë së Bardhë, Andreë Bates. Edhe sekretari i Përgjithshëm i NATO-s, Jens Stoltenberg i kritikoi ashpër deklaratat e Trumpit, dule thënë se4 "Çdo lloj aludimi, se nuk do të mbrohen aleatët, minon sigurinë tonë të përgjithshme, përfshirë edhe atë të Shteteve të Bashkuara". Në fushatën që po zhvillon tani, Trump mbetet ende skeptik i organizatave sikurse NATO-ja, duke u ankuar shpesh për miliardat që ndan SHBA-ja për aleancën ushtarake, e cila ka ofruar ndihmë shumë të rëndësishme për Ukrainën, teksa përballet me pushtimin rus. Pamjet: AFP