Gjykata më e lartë e Francës ka miratuar dënimin e ish-presidentit Nicolas Sarkozy për financim të paligjshëm të fushatës së rizgjedhjes së vitit 2012, duke lënë në fuqi vendimin që e dënon me një vit burg, gjysmën e të cilit me pezullim. Vendimi nënkupton se 70-vjeçari mund ta vuajë dënimin me një etiketë elektronike, pa hyrë fizikisht në burg. Sarkozy është shpallur fajtor për tejkalim masiv të shpenzimeve të fushatës dhe për përdorimin e kompanisë së PR-it, për të fshehur kostot reale. Ai ka mohuar vazhdimisht akuzat. Sipas prokurorëve, partia e tij shpenzoi gati dyfishin e limitit ligjor prej 22.5 milionë eurosh, duke financuar tubime dhe ngjarje luksoze të fushatës. Ky është dënimi i dytë përfundimtar për Sarkozy-n. Në dhjetor të vitit të kaluar, Gjykata e Lartë e Apelit la në fuqi dënimin e tij për korrupsion, çka e detyroi të mbante një byzylyk elektronik për 6 muaj. Në shtator, ai u dënua me pesë vjet burg për konspiracion kriminal. Sarkozy kaloi 20 ditë në burg përpara se të lirohej në nëntor.