Britania e Madhe ka vendosur sanksione ndaj shtatë individëve rusë të lidhur me zhvillimin dhe prodhimin e armëve kimike të përdorura në helmimet në Salisbury dhe raste të tjera të raportuara ndër vite. Sipas autoriteteve britanike, masat shënjestrojnë persona të përfshirë në kërkimin dhe sintezën e agjentëve nervorë si Novichok, të cilët janë përdorur në sulme që kanë shkaktuar viktima civile, përfshirë aktivistin rus të opozitës Alexei Navalny dhe shtetasen britanike Dawn Sturgess. Në kuadër të vendimit, sanksione janë vendosur edhe ndaj dy qendrave kërkimore në Rusi, të identifikuara si SC Signal dhe GNIII VM, si dhe drejtuesve dhe specialistëve të tyre kryesorë. Sekretarja e Jashtme britanike, Yvette Cooper, e cilësoi përdorimin e armëve kimike nga Rusia si shkelje të rëndë të ligjit ndërkombëtar dhe kërcënim për sigurinë globale, duke theksuar se Londra do të vijojë të ndërmarrë masa në bashkëpunim me aleatët për të parandaluar përdorimin e tyre.