Italia dhe Franca kanë riafirmuar partneritetin e tyre strategjik gjatë samitit të 36-të dypalësh të mbajtur në Antibes, ku Presidenti francez Emmanuel Macron dhe Kryeministrja italiane Giorgia Meloni theksuan rëndësinë e bashkëpunimit të ngushtë mes dy vendeve për stabilitetin e Evropës dhe Perëndimit. “Italia dhe Franca janë partnerë të domosdoshëm. Ky është kuptimi i Paktit të Kuirinalit që nënshkruam”, deklaroi Macron në përmbyllje të samitit, duke nënvizuar se marrëdhëniet mes dy vendeve janë të bazuara në respekt dhe bashkëpunim të ndërsjellë. Nga ana e saj, Meloni theksoi se “pa Italinë dhe Francën, Evropa dhe Perëndimi nuk do të ishin ato që janë”, duke e konsideruar partneritetin si thelbësor për të ardhmen e Bashkimit Evropian. Samiti, i cili ishte shtyrë disa herë që prej vitit 2020, u zhvillua në një klimë të konsideruar pozitive dhe me tone uniteti, pavarësisht dallimeve të mëparshme politike mes Parisit dhe Romës. Të dy liderët theksuan se bashkëpunimi mes tyre nuk është i ftohtë, por i bazuar në diskutim serioz politik dhe mbrojtje të interesave kombëtare. “Ne mbrojmë interesat tona, por jemi të aftë të punojmë së bashku në mënyrë të respektueshme”, u shpreh Meloni, ndërsa Macron shtoi se “nuk ka asgjë të akullt mes nesh”.