Kryeministri Edi Rama reagoi në rrjetet sociale pas përfundimit të samitit të NATO-s, i zhvilluar në Hagë. Në një postim të shoqëruar me fotografi nga momentet kryesore të takimit, ai ka bërë të ditur se vendimi për organizimin e samitit të NATO-s në vitin 2027 në Tiranë është marrë në unanimitet të plotë nga liderët e Aleancës. “Hagë, Samiti i NATO-s vendosi unanimisht organizimin e tij në Tiranë në 2027”, ka shkruar Rama. Shqipëria është pjesë e NATO-s që nga viti 2009 dhe kjo do të jetë hera e parë që ajo mirëpret samitin e saj. Tw mwrkurwn udhëheqësit e 32 vendeve anëtare ranë dakord, në Samitin e Hagës, të rrisin në 5% shpenzimet për mbrojtjen, për shkak të kërcënimit që vjen nga Rusia. Ata u zotuan se do të ndihmojnë njëri-tjetrin, në rast se ndonjë nga shtetet anëtare sulmohet. “Të bashkuar përballë kërcënimeve dhe sfidave të thella të sigurisë, në veçanti kërcënimit afatgjatë që paraqet Rusia për sigurinë euroatlantike dhe kërcënimit të vazhdueshëm të terrorizmit, aleatët angazhohen të investojnë 5% të PBB-së çdo vit në kërkesat thelbësore të mbrojtjes, si dhe në shpenzimet që lidhen me mbrojtjen dhe sigurinë deri në vitin 2035”.