Presidenti ukrainas Volodymyr Zelensky tha të dielën se do të diskutojë pushtimin rus dhe përpjekjet për t'i dhënë fund atij gjatë një takimi me Presidentin e SHBA-së Donald Trump në samitin e G7 në Francë. Zelensky tha se kishte zhvilluar një bisedë telefonike gjatë së dielës ku I kishte uruar presidentit amerikan ditëlindjen e 80-të, ndërsa pak pas tij edhe Kremlini deklaroi se Presidenti rus Vladimir Putin i telefonoi gjithashtu Trumpit për të folur rreth luftërave në Ukrainë dhe Iran. Zelensky tha në rrjetet sociale se ai dhe Trump “diskutuan gjëra që mund të ndihmojnë në sjelljen e paqes tani, dhe se e ka informuar presidentin për zhvillimet e fundit në fushën e betejës dhe se si është forcuar pozicioni i Ukrainës”. "Ne ramë dakord që do të diskutojmë më shumë gjatë takimit tonë në Samitin e G7-ës. Kemi disa ide të mira që mund të ndihmojnë në avancimin e paqes dhe mbrojtjen e jetëve", u shpreh Zelensky. Trump do të marrë pjesë në një sesion pune të G7 me Zelenskyn në Francë të martën. Bisedimet e udhëhequra nga SHBA-të për t'i dhënë fund konfliktit në Ukrainë janë lënë mënjanë për shkak të luftës me Iranin dhe përparimet ruse në fushën e betejës po tregojnë shenja humbjeje të fuqisë. Trump i ka shtyrë të dyja palët që t’i japin fund konfliktit, por ende pa sukses, ndonëse fillimisht u mburr se mund t’i jepte fund luftës brenda një dite nga marrja e detyrës.