Për të parën herë në pothuajse dy dekada, parada gjigande ushtarake e Rusisë që kremton fitoren në Luftën e Dytë Botërore, do të zhvillohet pa armët e rënda, dhe kjo për shkak të frikës së një sulmi nga ana e Ukrainës. Ministria ruse e mbrojtjes konfirmoi se në paradën e 9 majit në Sheshin e Kuq, e cila shënon fitoren sovjetike ndaj Gjermanisë naziste, nuk do të kalojë asnjë automjet i blinduar apo sistem raketor, vendim ky i justifikuar me situatën operative aktuale. Kremlini deklaroi se “aktiviteti terrorist ukrainas” ishte arsyeja pas ndryshimeve në paradën vjetore. Blogerë dhe analistët ushtarakë rusë shkruajnë se Moska druhet se sulme me dronë me rreze të gjatë veprimi nga ana e Kievit mund të shënjestrojnë pajisjet ushtarake gjatë paradës. Ruslan Leviev, një analist i pavarur i cituar nga mediat britnikë u shpreh se “pajisjet janë të cenueshme edhe gjatë fazës së përgatitjeve të paradës, pasi autokolonat ndalojnë edhe jashtë Moskës në fusha të hapura që janë të lehta për t’u goditur nga dronët.” Që nga pushtimi i plotë i Ukrainës nga Moska në 2022, paradat e Ditës së Fitores janë modifikuar, me shfaqje më të reduktuara ushtarake dhe më pak të ftuar nga jashtë. Përjashtim përbën përvjetori i 80-të vitin e kaluar me të paktën 27 krerë shtetesh të huaj të pranishëm dhe një procesion të plotë tankesh, raketahedhësish e dronësh në Sheshin e Kuq.