Ministri i jashtëm turk Mevlut Cavusoglu ka pritur në Ankara homologun rus Sergei Lavrov, i cili tha se situata aktuale me grurin e Ukrainës nuk ka të bëjë me krizën e ushqimit. Ministri turk tha se po punohet për lirimin e grurit ukrainas me anë të një mekanizmi ndërkombëtar. "Po punojmë për një mekanizëm bashkëpunimi mes Kombeve të Bashkuara, Federatës Ruse, Ukrainës e Turqisë, për të cilin besojmë se është i arsyeshëm e zbatueshëm”, tha Cavusoglu. “Nëse bota ka nevojë për eksportin e produkteve si nga Rusia dhe Ukraina, të gjithëve na leverdis të krijojmë kushtet për këtë”, shtoi ai. Rusia gjithashtu refuzoi pretendimet e Perëndimit se ofensiva në Ukrainë po nxit krizën botërore të ushqimit duke thënë se ofensiva e saj nuk ka dëmtuar fermat apo të mbjellat aty. "Me sa dimë ne, në Ukrainë ka shumë më pak grurë sesa thonë ukrainasit, prandaj nuk duhet ekzagjeruar rëndësia e këtyre rezervave”, tha zëdhënesi i Krimlinit, Dmitry Peskov. Rusia e Ukraina së bashku prodhojnë 30 përqind të rezervave botërore të drithit.