Një raketë balistike u lëshua në drejtim të Kievit nga ana e Rusisë këtë të shtunë. Sulmi ndaj kryeqytetit erdhi pas një pauze 52 ditore nga ana e ushtrisë ruse. Po ashtu edhe në zonat lindore dhe jugore të Ukrainës forcat ruse goditën disa qytete kryesore me dronë. Serhiy Popko, kreu i administratës ushtarake të qytetit të Kievit, tha se Rusia lëshoi një raketë balistike drejt kryeqytetit. “Raketa nuk ia doli të mbërrinte në Kiev pasi sistemet e mbrojtjes ajrore e rrëzuan atë”, shkroi Popko në aplikacionin e mesazheve ‘Telegram’. Ai sqaroi se nga raketa nuk pati asnjë viktimë apo dëme materiale. Sistemet e mbrojtjes ajrore të Ukrainës rrëzuan gjithashtu dhe 19 dronë të prodhimit iranian ‘Shahed’ nga 31 të lëshuar nga forcat ruse në rajonet jugore dhe lindore, thanë forcat ajrore në një deklaratë. Nga dronët, sipas autoriteteve ukrainase, u plagosën tre persona në rajonin e Odesës ndërsa u dëmtuan dhe disa objekte të portit. Rusia ka intensifikuar bombardimet e saj ndaj porteve të Ukrainës. Po kështu është goditur dhe infrastruktura e depozitimit të grurit që nga korriku kur Moska u tërhoq nga marrëveshja për eksportimin e drithërave përmes Detit të Zi, e cila mundësonte eksportimin e drithit Ukrainës drejt vendeve që kërcënohen nga uria. Pamjet: AFP