Rusia po i kthehet një skenari të njohur në përpjekjet e saj për të ndikuar në rezultatin e zgjedhjeve të ardhshme presidenciale në Shtetet e Bashkuara ndërkohë që është vënë në kërkim të mënyrave për të ndihmuar kandidaturën e ish Presidentit Donald Trump duke diskredituar fushatën e Presidentit Joe Biden, sipas zyrtarëve amerikanë të zbulimit. Një vlerësim i ri i kërcënimeve për zgjedhjet e nëntorit nuk përmend asnjë kandidat me emër. Por një zyrtar u tha gazetarëve se këndvështrimi i Kremlinit rreth skenës politike amerikane nuk ka ndryshuar nga ciklet e mëparshme zgjedhore. Zyrtari tha se kjo preferencë është përforcuar për shkak “të rolit të Shteteve të Bashkuara përsa i përket Ukrainës dhe politikës së përgjithshme ndaj Rusisë”, raporton Zëri i Amerikës. Ky paralajmërim vjen gati katër vite pas një tjetër paralajmërimi të ngjashëm të bërë në prag të zgjedhjeve presidenciale të vitit 2020, gjatë të cilave presidenti i atëhershëm Trump garonte kundër Biden. Moska po përdor “një sërë masash për të diskredituar Bidenin dhe atë që e konsideron si një ‘klasë politike’ anti-Rusi”, tha në atë kohë ish drejtuesi i Qendrës Kombëtare amerikane të Kundërzbulimit dhe Sigurisë, William Evanina. “Disa aktorë të lidhur me Kremlinin gjithashtu po synojnë të ndihmojnë kandidaturën e Presidentit Trump në rrjete sociale dhe televizionin rus”, sipas tij. Zyrtarët amerikanë të zbulimit thanë se po komunikojnë me dy ekipet e fushatave presidenciale dhe kandidatët, por nuk kanë pranuar të flasin se çfarë lloj informacioni është ndarë me ta. Trump hodhi poshtë vlerësimin e zyrtarëve amerikanë të zbulimit, duke e cilësuar të çuditshëm. “Vladimir Putini e mbështeti Joe Biden për president sepse ai e di që Bideni është i dobët dhe mund të frikësohet lehtë”, tha në një reagim për VOA-n zëdhënësja e fushatës së zotit Trump, Karoline Leavitt. Ndërsa ekipi i fushatës së Bidenit ende nuk i është përgjigjur kërkesës për koment rreth vlerësimit të ri amerikan. DASH njoftoi të martën se ka sekuestruar dy faqe interneti dhe 968 llogari në platformën sociale X, pjesë të asaj që zyrtarët e përshkruajnë si projekt të organeve ruse të zbulimit dhe platformës mediatike shtetërore të Rusisë RT me përdorimin e inteligjencës artificiale.