Forcat ruse kanë goditur sërish objektet energjetike të Ukrainës, me sulme në Kiev dhe qytete të tjera të mëdha. Presidenca ukrainase tha se kishte pasur tre shpërthime në Kiev ndërsa gazetarët e BBC raportuan për shtëllunga tymi që ngriheshin në anën e majtë të qytetit në orët e para të mëngjesit. Dy objekte u dëmtuan rëndë në qytetin qendror të Dnipros dhe u raportuan ndërprerje të energjisë në Zhytomyr. Sulmet e fundit erdhën 24 orë pasi Kievi u godit nga dronët "kamikaze". Dronët pa pilot, që besohet se janë të prodhuar nga Irani, vranë të paktën tetë njerëz në kryeqytet dhe qytetin verior të Sumy, dhe goditën infrastrukturën kritike, me ndërprerje të energjisë elektrike të raportuara në qindra qytete dhe fshatra.