Presidenti rus Vladimir Putin kritikoi sulmet ndaj Iranit si “të paprovokuara” dhe “të pabazuara” gjatë një takimi me ministrin e Jashtëm të Teheranit, Abbas Araghchi, por nuk njoftoi ndonjë mbështetje konkrete për aleatin kryesor në Lindjen e Mesme. Moska është një mbështetëse kyçe e Iranit, por nuk është angazhuar fuqishëm pranë partnerit të saj edhe pse Shtetet e Bashkuara nisën sulme ndaj objekteve bërthamore të Iranit gjatë fundjavës. Putin nuk përmendi drejtpërdrejt sulmet e SHBA-së, por foli në mënyrë të përgjithshme për “sulme” kundër Iranit, megjithëse Kremlini më herët të hënën kishte thënë se i dënon dhe shpreh keqardhje për sulmet amerikane. Ka pasur një eskalim të ri të tensioneve në rajon, dhe sigurisht që ne e dënojmë këtë dhe shprehim keqardhje të thellë,” tha zëdhënësi i Kremlinit, Dmitry Peskov, për gazetarët pak para se Putin të takohej me Araghchin në Kremlin. Që prej se Izraeli nisi valën e sulmeve më 13 qershor, Rusia nuk ka ofruar publikisht ndihmë ushtarake Teheranit. Putin dhe zyrtarë të tjerë kanë minimizuar detyrimet e Moskës sipas një marrëveshjeje strategjike të gjerë të nënshkruar me Teheranin vetëm disa muaj më parë, duke theksuar se nuk është një pakt mbrojtjeje reciproke. Rusia po “bën përpjekje për të ndihmuar popullin iranian,” tha Putin në takim, pa dhënë detaje të mëtejshme. Kur u pyet se çfarë mbështetje specifike mund të ofrojë Rusia, Peskov u përgjigj për gazetarët: “Gjithçka varet nga ajo që Iranit i nevojitet. Ne kemi ofruar shërbimet tona të ndërmjetësimit.” Peskov gjithashtu tha se sulmet e SHBA-së ndaj Iranit nuk do të ndikojnë marrëdhëniet dypalëshe mes Moskës dhe Uashingtonit, duke thënë se janë “çështje të ndryshme”. Putin tha javën e kaluar se Irani nuk kishte kërkuar ndonjë mbështetje nga Rusia.