Ambasada shqiptare në Kiev u godit të premten nga raketat e lëshuar prej Rusisë. Sulmin që preku edhe 5 ambasada të tjera, Deputeti i Partisë Socialiste, Pandeli Majko e quan mesazh të mirëmenduar. Në një reagim në ‘Facebook’, Majko zbërthen atë që fshihet pas sulmit rus, duke u shprehur se politika ruse nuk bën asgjë gabimisht. “Sulm i ushtrisë ruse ndaj ambasadës së Shqipërisë në Kiev… Politika ruse, si rregull, nuk bën asgjë, gabimisht! Ajo të kujton, në mënyrën e vet, se çdo gjë ka çmim! (shënim nga Prishtina)” Ministria shqiptare e Punëve të Jashtme raportoi më herët se sulmet ruse kanë shkaktuar dëme në godinën e ambasadës së Shqipërisë në Kiev, duke rrezikuar edhe jetën e punonjësve. “Si pasojë e këtyre sulmeve, u dëmtuan pjesërisht fasada e jashtme dhe disa hapësira brenda godinës së ambasadës së Republikës së Shqipërisë në Kiev dhe ambasadave të pesë vendeve të tjera, duke vënë në rrezik jetën e personelit diplomatik. Ne dënojmë pa asnjë mëdyshje këto sulme brutale. Ky akt i pakuptimtë është një sulm ndaj themeleve të vetë diplomacisë ndërkombëtare”. Pas reagimit ku dënonte sulmin, bëhet me dije se Ministri i Jashtëm i Shqipërisë, Igli Hasani ka thirrur në ministri ambasadorin rus, Zaitsev Alexei Anatolyevitch. Ambasadori rus është thirrur në Ministrinë e Jashtme për të dhënë sqarime lidhur me ngjarjen. Për sulmin që dëmtoi edhe 5 ambasada të tjera, ushtria ukrainase tha se forcat ruse përdorën raketat Kinzhal dhe Iskander në këto sulme, që raportohet të kenë mbetur pa energji elektrike 600.000 banorë, ndërsa u dëmtua edhe një spital.