Ministria ruse e mbrojtjes publikonte sot pamjet e trupave ushtarake që ngarkoheshin në avionë për të shkuar në Kazakistan, në ndihmë të shtypjes së protestës popullore atje. Në demonstratat kundër ngritjes së çmimeve të energjisë në republikën ish-sovjetike, raportohet për dhjetra të vrarë tre ditët e fundit. Presidenti kazak Tokajev kërkoi zyrtarisht ndihmën e aleancës ushtarake të drejtuar nga Moska, ku përfshihen pesë republika të tjera ish-sovjetike. Disa orë pas apelit të Tokajev aleanca tha se ishin dërguar trupat e para ushtarake dhe para-ushtarake, në misionet e para që prej themelimit në vitin 1999. "Forca paqeruajtëse janë dërguar në republikën e Kazakistanit për një kohë të caktuar, që do të ndihmojnë në stabilizimin dhe normalizimin e situatës”, thuhej në një deklaratë. Kryetari aktual i grupit, kryeministri armen Nikol Pashinian, tha se aleanca pranonte kërkesën pasi Kazakistani përballej me "ndërhyrje nga jashtë". Pamjet e publikuara nga ministria e mbrojtjes tregonin avionët ushtarakë që ngarkoheshin me trupa dhe autoblinda, para se të ngriheshin nga pistat me dëborë drejt Kazakistanit.