Shtetet e Bashkuara dhe Rusia kanë shkëmbyer basketbollisten e burgosur amerikane, Brittney Griner, me tregtarin famëkeq të armëve, Viktor Bout, që për 12 vjet ishte në një burg amerikan. Presidenti amerikan, Joe Biden, tha se Griner është e sigurt dhe është nisur për në shtëpi me një avion nga Emiratet e Bashkuara Arabe. Griner ishte arrestuar në aeroportin e Moskës në shkurt për posedim të vajit të kanabisit dhe muajin e kaluar u dërgua në një burg. Administrata Biden në korrik propozoi këmbimin e të burgosurve, duke e ditur se Moska për një kohë të gjatë ka kërkuar lirimin e Bout. Ministria e Jashtme e Rusisë konfirmoi këmbimin e të burgosurve, që tha se ka ndodhur në aeroportin e Abu Dabit. Viktor Bout u ka shitur armë komandantëve të luftës dhe shumë qeverive, duke u shndërruar në një prej njerëzve më të kërkuar në botë.I cilësuar si “tregtari i vdekjes” për shkak të shitjes së armëve që nga rënia e Bashkimit Sovjetik, të bëmat e këtij shtetasi rus inspiruan filmin e Hollyëoodit, Lord of Ëar, që bazohej në jetën e tij. Ai u arrestua më 2008 në Bankok dhe u ekstradua dy vjet më vonë në SHBA, ku qëndroi për 12 vjet në burg, pasi u gjet fajtor për mbështetje të terroristëve që vranë amerikanët.Ndërkaq, Brittney Griner, 31 vjeçe, është sportiste shumë e njohur në Amerikë. Arsyeja e vetme që ajo kishte udhëtuar drejt Moskës ishte për të luajtur në Rusi, në kohën kur në SHBA ligat e basketbollit janë në pushim. Ajo kishte pranuar se kishte bërë “gabim të paqëllimshëm” kur kishte marrë me vete vaj të kanabisit, për të cilin u dënua. Pamjet: AFP