Raundi i dytë i bisedimeve midis Rusisë dhe Ukrainës, i zhvilluar në Stamboll, përfundoi pas vetëm një ore, duke lënë pas një memorandum të ri rus që vendos kushte të ashpra për një armëpushim të mundshëm. Sipas dokumentit të dorëzuar delegacionit ukrainas, Moska ka paraqitur një sërë kërkesash të cilat përfshijnë çmobilizimin e forcave ukrainase dhe heqjen e gjendjes së jashtëzakonshme në vend si parakusht për çdo marrëveshje paqeje. Në tekstin e dokumentit, Rusia kërkon njohjen formale të pesë rajoneve: Krimesë, Donjetskut, Luganskut, Zaporozhzhias dhe Khersonit – si pjesë të territorit të saj. Po ashtu, Kievi duhet të tërheqë forcat e tij nga këto zona dhe të ndalojë çdo operacion ushtarak në territoret përkatëse, si kusht i domosdoshëm për një armëpushim 30-ditor. Sipas burimeve nga agjencitë ruse TASS dhe Ria Novosti, Rusia ka propozuar dy “opsione” për ndalimin e luftimeve: 1. Tërheqja e menjëhershme e trupave ukrainase nga katër rajonet e pushtuara pjesërisht. 2. Demobilizimi i ushtrisë ukrainase, heqja e ligjit ushtarak, përjashtimi i forcave të huaja dhe ndalimi i ndihmës ushtarake ndërkombëtare për Kievin, si dhe organizimi i zgjedhjeve në Ukrainë brenda 100 ditësh nga heqja e ligjit ushtarak. Presidenti ukrainas Volodymyr Zelensky e ka refuzuar prerazi ofertën e Rusisë, duke e cilësuar atë si një përpjekje për të “fituar kohë”. Ai i ka bërë thirrje homologut të tij amerikan Donald Trump, që aktualisht ndodhet në kontakt të drejtpërdrejtë me të dy palët, të vendosë sanksione të reja ndaj Rusisë për të detyruar Moskën të ndalë përfundimisht agresionin. “Rusia nuk kërkon një paqe të vërtetë, por vetëm një pauzë të shkurtër në luftime. Ne presim që SHBA dhe Presidenti Trump të veprojnë me vendosmëri,” deklaroi Zelensky gjatë një konference për shtyp në Kiev.