Një dron rus ka goditur një tren pranë kufirit Ukrainë-Poloni, pak pasi ish-kryeministri i Mbretërisë së Bashkuar, Boris Johnson, dhe zyrtarë të lartë evropianë të sigurisë kishin kaluar aty me një tjetër tren. Po ashtu raportohet se në të njëjtin tren me Johanson udhëtonte edhe ish-kryeministri suedez Carl Bildt. Droni goditi lokomotivën e trenit, por fatmirësisht pa shktuar viktima. Të gjithë pasagjerët u evakuuan, sipas autoriteteve ukrainase. Rusia tha se kishte goditur “infrastrukturën hekurudhore” në Ukrainën perëndimore, por kompania shtetërore hekurudhore e Ukrainës tha se “ka shumë mundësi që objektivi i këtij droni të ketë qenë treni me diplomatë”. Autoriteti hekurudhor ukrainas konfirmoi po ashtu lëvizjen me një tjetër tren në zonë të ish-shefit të CIA-s, David Petraeus. “Nuk e di se çfarë logjike e shtrembëruar e shtyu Putinin të hidhte në erë një lokomotivë ukrainase të palëvizshme në kufirin polak këtë mëngjes.”, komentoi Boris Johanson në një status në X, duke shtuar se ky është një nga shumë sulme të pakuptimta që ukrainasit po durojnë çdo ditë, madje edhe në hekurudhat civile" dhe u bëri thirrje aleatëve të Kievit që t'u sigurojnë urgjentisht ukrainasve "mbrojtjen ajrore që u nevojitet". Ukraina u ka bërë thirrje të përsëritura aleatëve të saj - veçanërisht SHBA-së që të sigurojnë më shumë raketa interceptore për t'u mbrojtur nga sulmet e përditshme ruse që përdorin gjithnjë e më shumë raketa balistike me lëvizje të shpejtë dhe dronë me helikë reaktive. Sulmet me dronë rusë 2 kilometra larg kufirit polak, përfshirë edhe në një tren që shkonte për në Varshavë, janë një "përshkallëzim" i luftës nga Moska, tha në Kiev ministri i jashtëm polak Radoslaë Sikorski, duke bërë thirrje për "dyfishimin" e mbështetjes për Ukrainën.