Shtetet e Bashkuara të Amerikës dhe aleatët evropianë janë duke finalizuar propozimin për armëpushim 30-ditor në Ukrainë, i cili nëse refuzohet do të thotë se ata së bashku do t’i vendosin sanksione të reja Rusisë, sipas një burimi diplomatik francez, ka raportuar agjencia e lajmeve “Reuters”. Presidenti i SHBA-së, Donald Trump, bëri thirrje për një armëpushim 30-ditor pa kushte midis Rusisë dhe Ukrainës, duke paralajmëruar se Washingtoni dhe partnerët e tij do të vendosin sanksione të mëtejshme nëse armëpushimi nuk respektohet. Ukraina ka shprehur gatishmëri për të pranuar propozimin e SHBA-së, ndërsa Rusia shpalli në mënyrë të njëanshme armëpushim treditor që do të zgjasë nga 8 deri më 10 maj, për 80-vjetorin e përfundimit të Luftës së Dytë Botërore. “Nuk jemi plotësisht me një projekt të finalizuar, por shpresojmë se jemi në një moment konvergjence”, ka thënë burimi diplomatik, duke folur në kushte anonimiteti. “Çfarë mund të ndodhë në orët dhe ditët në vijim, mund të ketë një njoftim për një armëpushim ose 30-ditor ose të ndarë në pjesë, gjë që është ende duke në diskutim”. Franca, Britania dhe Gjermania gjatë javëve të fundit kanë kërkuar koordinim më të ngushtë me Washingtonin. Dy javë më parë ato kundërshtuan disa propozime të SHBA-së për mënyrën se si t’i jepet fund luftës në Ukrainë, duke bërë kundërpropozime për çështje nga territori te sanksionet.