Ukraina sulmoi me dronë një depo nafte dhe objekte logjistike në Moskë, duke plagosur dhjetëra persona, ndërsa shtëllungat e mëdha të tymit mbuluan kryeqytetin rus. Kievi u zotua se do të përgjigjet ndaj sulmeve vdekjeprurëse ruse që vranë disa persona. Presidenti ukrainas, Volodymyr Zelensky, konfirmoi sulmet në Moskë, duke shtuar se janë goditur gjithashtu dy cisterna nga “flota në hije” e Rusisë dhe katër anije mallrash, teksa Ukraina lëshoi qindra dronë. Sulmet u kryen pasi një raketë ruse goditi një anije që transportonte misër pranë portit ukrainas të Odesës, kur u vranë dhjetë persona. Marina ukrainase tha se anija Golden Leo, me ekuipazh nga India dhe Siria, u përfshi nga flakët pasi u godit nga tri raketa lundruese ruse më 19 korrik. Pas operacioneve të kërkim-shpëtimit të kryera gjatë natës nëntë anëtarë të ekuipazhit dhe një pilot detar u gjetën të vdekur, ndërsa tetë nga 17 anëtarët e ekuipazhit u shpëtuan. Menjëherë pas këtij sulmi, ushtria ukrainase njoftoi se kishte goditur shtatë anije ruse në Detin e Zi dhe Detin Azov, si dhe shtatë objekte energjetike në Krimenë e pushtuar nga Rusia. Ndërkaq, Forcat Ajrore ukrainase thanë më 20 korrik se edhe Rusia kishte kryer një sulm ndaj Ukrainës, duke përdorur dy raketa ajrore dhe 94 dronë sulmues.