Të paktën gjashtë persona u vranë në kryeqytetit ukrainas, Kiev, dhe disa të tjerë u plagosën, pasi një person hapi zjarr dhe qëlloi njerëzit në rrugë, ndërsa më pas mori pengje të tjerë në një supermarket. Ministri i Brendshëm ukrainas tha se agresori u qëllua për vdekje në supermarket, pas një shkëmbimi zjarri me policinë. Presidenti ukrainas, Volodymyr Zelensky, tha se 14 persona janë plagosur, përfshirë një djalë 12-vjeçar. Ai njoftoi se katër persona ishin vrarë në rrugë, ndërsa një grua, që mendohet të jetë rreth 30 vjeç, vdiq më vonë në spital. Sulmuesi vrau gjithashtu një peng brenda marketit. Forcat e sigurisë tentuan për rreth 40 minua të negocionin me sulmuesin, i cili nuk pranoi të dorëzohej, duke u qëlluar për vdekje. "Ne u përpoqëm ta bindnim, për të ndaluar gjakderdhjen. Por ai nuk u përgjigj, kështu që u dha urdhri për ta eliminuar, veçanërisht pasi vrau një nga pengjet”, thanë autoritetet e sigurisë. Hetuesit ukrainas po shqyrtojnë nëse sulmi terrorist në Kiev është drejtuar nga Moska, pasi Prokurori i përgjithshëm i Ukrainës e identifikoi autorin e sulmit si një burrë 58-vjeçar nga kryeqyteti rus, dhe tha se ai kishte përdorur një armë automatike për të kryer të shtënat fatale. Zelensky tha se autori i sulmit kishte jetuar në rajonin lindor të Donetskut - i cili është kryesisht nën pushtimin rus. Ai tha gjithashtu se burri i kishte vënë flakën apartamentit të tij përpara se të largohej për të filluar të shtënat.