Pamjet satelitore të siguruara nga firma teknologjike, Maxar, tregojnë se pavarësisht pretendimeve për tërheqje, Rusia ka vazhduar grumbullimin e trupave në kufirin me Ukrainën. Madje fotot tregojnë se ushtria ruse ka ndërtuar dhe një urë të përkohëshme mbi lumin Pripyat River, vetëm gjashtë kilometra nga kufiri i Bjellorusisë me Ukrainën. Një urë e tillë raportohet të ketë rëndësi të madhe strategjike për shkak se e shkurton ndjeshëm distancën që duhet të përshkonin njësitë ushtarake ruse të nisura drejt Ukrainës. Këto imazhe u konsideruan si dëshmi tjetër e faktit që Moska nuk ka hequr dorë nga planet e saj. Nga ana tjetër, edhe njësitë e artilerisë u pikasën duke kryer manovra në Bjellorusi, ndërsa në zonë është ngritur dhe një spital i madh fushor. Përpjekjet diplomatike për të shmangur luftën morën një nxitje të re këtë javë pasi Presidenti Vladimir Putin tha se Rusia ishte e gatshme të diskutonte për çështjet e sigurisë me NATO-n dhe se po tërhiqte disa nga trupat e saj të grumbulluara pranë kufijve të Ukrainës. Shtetet e Bashkuara dhe aleatët e tyre e kanë mirëpritur shprehjen e vullnetit për hapa diplomatike, por thonë se nuk kanë parë prova konkrete për një ulje të përshkallëzimit ushtarak rus.