Regjisorja ruse Yevgeniya Berkovich dhe dramaturgia Svetlana Petriychuk janë dënuar me gjashtë vjet burg me akuzën “justifikim i terrorizmit” në një pjesë teatrale të 2021 për gratë që martoheshin me luftëtarë xhihadist në Siri. Të dyja u dënuan pas gjyqit me dyer të mbyllura, teksa arrestimi tyre vitin që shkoi tronditi komunitetin e artistëve në Rusi. Shtimi i presionit ndaj komunitetit të artistëve në Rusi vjen pas qëndrimeve kritike ndaj rekrutimeve të Kremlinit për luftën brutale në Ukrainë. Dënimi i dhënë sot nga gjykatësit ishte i njëjtë me atë të kërkuar nga prokurorët, thanë avokatët e mbrojtjes. Gratë erdhën në gjykatë të prangosura ndërsa ndarja e tyre e xhamtë në sallë, ruhej nga policë të armatosur e të maskuar, raporton AFP. Avokatja mbrojtëse e cilësoi dënimin si “ilegal, në një seancë të padrejtë” duke thënë se gratë ishin të pafajshme. Gjatë leximit të dënimit, bashkëshorti i Berkovich, Nikolai Matveyev, i cili punon në grupin e pavarur teatral, shpërtheu në lot. Prokurorët thanë se me pjesën teatrale të vitit 2021 për gratë ruse që josheshin të martoheshin me militantë të ISIS në Siri artistet kishin favorizuar terrorizmin, megjithëse drama ka marrë dy çmime të rëndësishme. Kremlini ka vendosur kufizime të ashpra ndaj prodhimit artistik që prej nisjes së ofensivës në Ukrainë në shkurt 2022, çka ka bërë që shumë figura të artit të largohen nga vendi/