Sonda Luna-25, misioni i parë rus në Hënë në pothuajse 50 vjet, është rrëzuar në Hënë pas një incidenti gjatë manovrave para uljes, tha të dielën agjencia ruse e hapësirës Roscosmos. Komunikimi me Luna-25 u humb në orwn 2:57 pasdite të shtunën, tha Roscosmos. Sipas gjetjeve paraprake, sonda eshte përplasur me sipërfaqen e Hënës". Masat e marra më 19 dhe 20 gusht për lokalizimin e mjetit dhe kontaktin me të rezultuan të pasuksesshme. Agjencia hapësinore tha se do të nisë një hetim për shkaqet e rrëzimit, pa dhënë asnjë tregues se çfarë probleme teknike mund të kenë ndodhur. Me Luna-25, Moska kishte shpresuar të ndërtonte mbi trashëgiminë e programit të saj Luna të epokës sovjetike, duke shënuar një kthim në eksplorimin e pavarur hënor përballë izolimit në rritje nga Perëndimi. Sonda 800 kilogramëshe Luna-25 do të kishte bërë një ulje të butë në polin jugor hënor, e para në histori. Rusia nuk ka tentuar të ulet në një trup qiellor që nga viti 1989, kur sonda fatkeqe e Bashkimit Sovjetik Phobos 2 për të eksploruar hënat e Marsit dështoi për shkak të një mosfunksionimi të kompjuterit në bord. Shefi i Roscosmos, Yuri Borisov, kishte thënë se sipërmarrja do të ishte "e rrezikshme", duke i thënë presidentit Vladimir Putin ballë për ballë në qershor se probabiliteti për të pasur sukses ishte "rreth 70 për qind".