Sekretari amerikan i Shtetit, Marco Rubio, ka marrë drejtimin e Agjencisë së Shteteve të Bashkuara për Zhvillim Ndërkombëtar (USAID). Mediat në SHBA kanë raportuar ditëve të fundit se administrata e presidentit amerikan, Donald Trump, duket se po mbyll USAID-in, në kuadër të një morie masash për shkurtime të shpenzimeve qeveritare. Organizatat humanitare ndërkombëtare kanë paralajmëruar se një vendim i tillë mund të ketë pasoja katastrofike për disa vende. Në krye të nismës për mbylljen e Agjencisë së Shteteve të Bashkuara për Zhvillim Ndërkombëtar është Elon Musk, i emëruari i Trumpit për ulje të shpenzimeve qeveritare. Musk pretendon se administrata mund t’i ulë shpenzimet për 1 trilion dollarë, dhe gjithë lëvizjen e tij e përshkruan si betejë kundër korrupsionit. Ndërkohë punonjësit e USAID-it kanë marrë një njoftim se selia e agjencisë në Uashington do të jetë e mbyllur për personelin, më 3 shkurt, “me vendim të udhëheqjes së agjencisë”, kanë raportuar mediat amerikane. I pyetur rreth kësaj, Rubio tha se ka shumë funksione të USAID-it “që do të vazhdojnë”, por “duhet të jenë në linjë me politikën e jashtme amerikane”. “Çdo dollar që shpenzojmë, çdo program që financojmë, ai program do të jetë në linjë me interesat kombëtare të SHBA-së. USAID-i ka një histori të injorimit të kësaj tradite dhe ka vendosur që të veprojë si një organizatë bamirëse globale, e ndarë nga interesat kombëtare. Por është totalisht gabim sepse këto janë para të taksapaguesve”, deklaroi kryediplomati amerikan më 3 shkurt gjatë vizitës në El Salvador. USAID vepron prej 33 vitesh edhe në Shqipëri dhe llogaritet që kjo Agjenci ka dhënë rreth 500 milionë dollarë asistencë për të mbështetur vendin tonë në tranzicionin e gjatë drejt një vendi normal demokratik.