E premtja pritet që të jetë një ditë me angazhime në Ministrisrinë e Brendshme që do të reflektojnë në ndryshime në kupolën drejtuese të policisë së shtetit përfshi edhe kryepolicin Muhamet rrumbullaku i cili nesër pritet të përmbyllë ciklin 2 vjeçar në këtë detyrë. Me hyrjen në fuqi të ligjit të ri për policinë e shtetit ky pozicion do të fitohet me konkurs gara për të cilin pritet të çelet nesër nga Ministri i brendshëm. Ervin Hoxha, Ministër i Punëve të Brendshme në detyrë prej 1 gushtit, ka patur pak dalje publike e deklarime mediatike. Pavarësisht këtij profili të ulët, këto 36 ditë në detyrë, ai i ka përdorur për të hartuar një mori me ndryshime të thella në Ministrinë që drejton. Top Channel, duke iu referuar burimeve nga Ministria e Punëve të Brendshme dhe qeveria, ka mësuar se priten ndryshime të shumta në Drejtorinë e Përgjithshme të Policisë së Shtetit dhe drejtuesit e drejtorive vendore, të cilat ministri Hoxha me shumë mundësi t’i njoftojë paraditen e së premtes. Priten ndryshime edhe në drejtoritë në varësi të Ministrisë së Brendshme.