Deputetët gjermanë pritet të përfitojnë nga korriku një rritje automatike të dietave, e lidhur kjo me ecurinë e përgjithshëm të pagave në Gjermani. Por shumica dërrmuese e qytetarëve e kundërshtojnë këtë vendim. Sipas një sondazhi të institutit YouGov, të realizuar për Agjencinë Gjermane të Shtypit, 85 për qind e të anketuarve kërkojnë që ligjëvënësit të heqin dorë nga rritja e planifikuar e pagave. Kundërshtimi më i madh u regjistrua mes mbështetësve të AfD-së, ku 93 për qind janë kundër rritjes. Edhe votuesit e SPD-së dhe të CDU/CSU-së u shprehën qartë për pezullimin e saj, përkatësisht me 87 dhe 85 për qind. Sondazhi rikujton se Bundestagu ka mundësi ta pezullojë rritjen, ashtu siç ndodhi gjatë pandemisë së koronavirusit në vitin 2020. Sipas parashikimeve, paga mujore e 630 deputetëve do të rritej nga 1 korriku me rreth 497 euro, duke arritur në afro 12.330 euro në muaj. Rritja bazohet automatikisht në zhvillimin e pagave dhe është e parashikuar në ligjin për deputetët. Brenda Bundestagut po formohet një konsensus për ta ndalur këtë rritje. Përveç partive opozitare si të Gjelbrit, e Majta dhe AfD, edhe grupi parlamentar i SPD-se në qeveri është shprehur në favor të pezullimit. Drejtuesi Johannes Fechner, deklaroi se një rritje prej afro 500 eurosh në muaj, në një periudhë debatesh për kursime dhe shtrëngim financiar, do të ishte një “sinjal i gabuar politik”.