Të paktën 30 persona janë vrarë në atë që Ukraina thotë se është bombardimi më i madh me raketa ruse që prej nisjes së luftës. Numri I viktimave sipas bbc, mund të rritet. Ndërkohë më shumë se 160 persona raportohet se u plagosën nga shpërthimet që goditën orët e para të mëngjesit të së premtes Kievin, Odesën, Harkivin, Dnipron dhe Lviv. Presidenti ukrainas Volodymyr zelenksi tha se Rusia përdori të gjithë arsenalin e saj për të goditur zonat e banuara të Ukrainës. Ndërkohë ushtria raportoi se Moska lëshoi të paktën 158 dronë dhe raketa duke shënjestruar në të njëjtën kohë shumë objektiva të ndryshëm. Në fillim të kësaj jave, Ukraina kishte goditur një anije luftarake ruse në portin e pushtuar të Krimesë në Feodosia. Ofensiva ajrore e Moskës erdhi pak pasi Shtetet e Bashkuara i dhanë dritën jeshile paketës së fundit të ndihmës për Kievin për këtë vit, e cila kapte vlerën 250 milionë dollarë. Ndihma përfshin një sërë municionesh për mbrojtjen ajrore dhe sisteme të raketave të artilerisë me lëvizshmëri të lartë, municione artilerie dhe sisteme kundër blindave, mbi 15 milionë fishekë, pajisje mjekësore dhe të tjera. Paketës së ndihmës I është bashkuar edhe Britania e Bashkuar që njoftoi se do të dërgoj në Kiev 200 raketa.