Numri i dënimeve me vdekje në botë ka arritur nivel rekord në dhjetë vjet, thuhet në raportin e ri të “Amnesty International”. Më shumë se 1 500 ekzekutime kanë ndodhur në vitin 2024, teksa Irani, Iraku dhe Arabia Saudite, përbëjnë së bashku 1,380 prej tyre, ndërkaq në SHBA kanë ndodhur 25, theksohet në raport. Numri i përgjithshëm i vendeve që kryejnë dënimin me vdekje është 15. Sekretarja e Përgjithshme e Amnesty International, Agnes Callamard ka thënë se "batica po kthehet" në dënimin me vdekje, duke shtuar se "është vetëm çështje kohe derisa bota të çlirohet nga hija e trekëmbëshit". Ndërsa këto shifra janë më të lartat që kanë nga viti 2015, kur të paktën 1,634 persona iu nënshtruan dënimit me vdekje, shifra e përgjithshme e vërtetë ka të ngjarë të jetë më e lartë. Amnesty International thotë se shifra nuk përfshin të vrarët në Kinë, e cila besohet se kryen mijëra ekzekutime çdo vit. Koreja e Veriut dhe Vietnami gjithashtu nuk përfshihen, pasi ato janë klasifikuar si sekret shtetëror në këto vende dhe Amnesty International nuk ka të dhëna të sakta. Organizata bamirëse ka zbuluar se më shumë se 40% e ekzekutimeve në vitin 2024 janë kryer për vepra të lidhura me drogën, të cilat sipas saj ishin të paligjshme sipas ligjit të të drejtave të njeriut.