Presidenti amerikan Donald Trump është përfshirë sërish në polemika për shkak të një fyerjeje seksiste ndaj një gazetareje të Bloomberg, gjatë një udhëtimi me Air Force One. Teksa reporterja po e pyeste për çështjen Jeffrey Epstein, Trump iu kthye ashpër me shprehjet: “Rri urtë derrkuce! Hesht, trashaluqe!”, fjalë që kanë shkaktuar reagime të menjëhershme në mjedisin mediatik amerikan. Edhe para kësaj ngjarjeje, presidenti kishte bërë deklarata të diskutueshme gjatë takimit në Zyrën Ovale me princin saudit të kurorës, Mohammed bin Salman. Duke komentuar vrasjen e gazetarit Jamal Khashoggi, Trump zgjodhi të shmangte përgjegjësinë e Riadit, duke thënë: “Shumë njerëzve nuk u pëlqeu ai zotëri për të cilin po flisni. Pavarësisht nëse ju pëlqen apo jo, këto gjëra ndodhin.” Qëndrimi i tij ka nxitur kritika të forta nga aktivistët e të drejtave të njeriut dhe vetë komuniteti i gazetarëve. Ndërkohë, në skenën ndërkombëtare, presidenti po vlerëson ende opsionet ndaj krizës në Venezuelë. Edhe pse nuk ka marrë një vendim përfundimtar për një “veprim të drejtpërdrejtë ushtarak”, ai beson se presioni ekonomik dhe diplomatik ndaj regjimit të Karakasit mund të mjaftojë për të detyruar Nicolas Maduron të largohet, pa qenë e nevojshme një ndërhyrje e armatosur.