Pasditja e sotme ka rezultuar fatale për një avion, i cili u rrëzua në Sao Paolo të Brazilit, teksa në bord kishte 62 pasagjerë. Avioni ka rënë në një zonë të banuar, ndërsa pamjet e regjistruara nga dëshmitarët tregojnë momentin e tmerrit. Ai shihet duke rënë pranë oborrit të një banesë dhe më pas ka shpërthyer në flakë. Shtëllungat e tymit u ngritën në ajër teksa askush nuk ka mundur as të afrohet pranë avionit që shkrumbohet nga flakët. Ende nuk dihet fati tragjik i dhjetëra pasagjerëve, që për fat të keq mbetën të bllokuar brenda. Kompania ajrore VoePass ka reaguar duke konfirmuar lajmin, por u kursyer në detaje, përfshirë edhe arsyen e rrëzimit. Pas raportimit të ngjarjes në vendngjarje kanë mbërritur zjarrfikësit dhe policia, për të ndërhyrë. Duke folur në një ngjarje në jug të Brazilit, presidenti brazilian Luiz Lula da Sivla i kërkoi turmës të ngrihej në këmbë dhe të mbante një minutë heshtje. Ai tha se duket se të gjithë udhëtarët dhe anëtarët e ekuipazhit kanë vdekur, pa shpjeguar më tej.