Evakuimi i pasagjerëve të anijes turistike MV Hondius dhe rikthimi i tyre në vendet ku jetojnë rriti shqetësimin për përhapjen e mëtejshme të hantavirusit, por zyrtarët amerikanë të shëndetësisë qetësojnë publikun, duke e cilësuar rrezikun të ulët. Reagimi i mjekëve erdhi pasi një grua franceze dhe një shtetas amerikan, që u evakuuan nga anija turistike, rezultuan pozitive me hantavirus. Shtetasja franceze ndodhet në gjendje të rëndë dhe po trajtohet në një njësi të specializuar për sëmundje infektive në Paris, ndërsa pasagjeri amerikan nuk ka shfaqur simptoma. Ai është karantinuar në Nebraska, së bashku me turistët e tjerë amerikanë, që ndodheshin në anijen, ku shpërtheu virusi. “Siguria e pacientëve është përparësi kryesore”, thanë zyrtarët e shëndetësisë në Shtetet e Bashkuara, duke shtuar se simptomat e hantavirusit janë të ngjashme me ato të gripit, të tilla si ethe, dhimbje trupi, marramendje, kollë, të përziera, diarre. Të gjithë pasagjerët e anijes turistike MV Hondius, me kombësi nga vende të ndryshme të botës, do të qëndrojnë në karantinë të detyrueshme dhe nën monitorim mjekësor. Nga ana e saj, Organizata Botërore e Shëndetësisë, tha se është e mundur që të shfaqen raste të reja në javët në vijim, duke sqaruar se kjo do të vijë për shkak të periudhës së gjatë të inkubacionit të virusit dhe jo të transmetimit në komunitet. OBSH rekomandon izolim 42-ditor dhe monitorim të përditshëm për personat që kanë qenë në kontakt me të infektuarit. "Kjo është arsyeja pse duhet të qëndrojmë vigjilentë dhe të sigurohemi që në shenjat dhe simptomat e para njerëzit të izolohen dhe të ketë kujdes për ta”, tha OBSH.