Një zjarr masiv ka shkrumbuar mbi 20 hektarë pyll me pisha në Mallakastër, duke shkaktuar dëme të konsiderueshme. Zjarri ka përfshirë gjithashtu mbi 1 mijë rrënjë ullinj, dy banesa të pabanuara dhe një banesë të banuar, si dhe dy stalla bagëtish. Për shkak të situatës së rënduar, Drejtori i Përgjithshëm i Agjencisë Kombëtare të mbrojtjes civile Haki Çako, i cili mbërriti në zonë, ka urdhëruar që nëse është e nevojshme, të ndërmerren masa për evakuimin e banorëve të zonës. Ardhja e helikopterit ka ulur intensitetin e zjarrit, por është era ajo qe ndez vatra te reja. Sipas përgjegjësit të shërbimit zjarrfikës, Beso Enveri, terreni ka qenë i vështirë dhe jo vetëm zjarrfikësit, por edhe banorë të zonës kanë punuar me mjete rrethanore për fikjen e zjarrit. Dëmet nga zjarri janë të konsiderueshme dhe aksioni për shuarjen e flakëve vijon si nga toka ashtu edhe nga ajri.