Moti i rënduar i ditëve të fundit ka sjellë probleme serioze në Delvinë, veçanërisht në lagjen më të vjetër të qytetit, “Beqirefend”. Reshjet intensive të shiut kanë shkaktuar rrëshqitje të dukshme dheu, të cilat në disa raste kanë arritur deri pranë banesave të zonës. Një masiv i madh dheu ka marrë përpara edhe një qiparis rreth 500-vjeçar, i cili ka rrëshqitur bashkë me tokën duke rënë mbi një pjesë të një banese. Për pasojë, dy të moshuarit që jetonin aty janë larguar nga shtëpia dhe janë strehuar në një banesë tjetër, për shkak të rrezikut të lartë që paraqet vazhdimi i rrëshqitjeve. Fatmirësisht nuk raportohen dëme në njerëz, por situata mbetet shqetësuese. Shërbimet e bashkisë së Delvinë, së bashku me banorë të lagjes, kanë qenë në terren për të monitoruar dhe stabilizuar zonën, ndërsa kërkohet ndërhyrje më e thelluar për të shmangur rrezikun e mëtejshëm.