Mashtrimi i kryeministrit Albin Kurti nga dy komedianë rusë, të cilët iu prezantuan si presidenti i Letonisë, ka shkaktuar reagime të forta nga opozita në Kosovë. Pas incidentit, reagimet e para erdhën nga liderët opozitarë. Kreu i Lidhjes Demokratike të Kosovës, Lumir Abdixhiku, ka reaguar në rrjetet sociale me një video të shkurtër prej 10 sekondash, ku shihet teksa bën mimika të shqetësuara ndërsa i shikon Kurtin duke rënë pre e mashtrimit. Ai nuk ka shpjeguar asgjë më shumë krahas videos, por reagimi i tij është i qartë. Po ashtu, nënkryetarja e Partisë Demokratike të Kosovës, Vlora Çitaku, ka komentuar ngjarjen, duke theksuar se shqetësuese nuk është thjesht fakti që kreu i qeverisë ka rënë në grackë, por biseda “skandaloze” që është zhvilluar. Sipas saj, Kryeministri përdori këtë “takim” për të sulmuar opozitën, mediat, bizneset dhe madje edhe administratën e re amerikane. Ajo thekson se biseda nxjerr në pah një nivel shqetësues të sipërfaqshëm dhe të paditur në trajtimin e çështjeve të politikës së jashtme. Çitaku ka shkruar gjithashtu: “Nëse kjo është mënyra se si Kurti flet me liderë ndërkombëtarë, atëherë është për të ardhur keq.” Një situatë e ngjashme kishte ndodhur disa vite më parë me Hashim Thaçin, i cili kishte qenë objektiv nga të njëjtët komedianë rusë. Por, falë vigjilencës së stafit të tij, mashtrimi ishte zbuluar në një fazë të hershme. Në atë kohë, Thaçi shpjegoi se komedianët kishin tentuar të depërtojnë në zyrën e tij, por ishin ndaluar përmes masave të kujdesshme të institucioneve kosovare.