Aleatët e udhëheqëses më me ndikim të opozitës në Venezuelë, María Corina Machado , thonë se ajo është "rrëmbyer" nga rrugët e Karakasit nga zyrtarët e regjimit pasi doli fshehurazi nga streha e saj për të udhëhequr një protestë të madhe kundër presidentit autoritar, Nicolás Maduro. Maduro do të betohet për mandatin e tij të tretë presidencial të premten, pavarësisht dyshimeve të forta se ai vodhi zgjedhjet e vitit të kaluar. Trashëgimtari i Hugo Chavez-it nuk ka paraqitur asnjë provë për pretendimin e tij për fitore, ndërkohë që lëvizja e Machado-s ka publikuar votime të detajuara që ofrojnë prova bindëse se kandidati i saj, Edmundo González, fitoi zgjedhjet. Të enjten, mijëra mbështetës të opozitës dolën në rrugët e qyteteve në të gjithë Venezuelën për të protestuar kundër betimit të planifikuar të Maduros, pas thirrjes së Machado-s, e cila fshihej që pas votimit të 28 korrikut 2024 për të shmangur arrestimin ose rrëmbimin e saj. Pas më shumë se 133 ditësh të izoluar në një vend sekret, Machado, 57 vjeç, u rishfaq të enjten pasdite në zemër të një turme të madhe protestuesish në Karakas. Duke u ngjitur në një kamion, politikania e udhëhoqi turmën me thirrjet: "Ne nuk kemi frikë". Pasi mbajti një fjalim plot pasion, Machado u largua nga tubimi, por u “rrëmbye me dhunë”, thanë përfaqësuesit e saj në një deklaratë të shkurtër. "Zyrtarët e regjimit hapën zjarr mbi motoçikletat që po e transportonin atë," shtuan përfaqësuesit e Machado.