Protesta nuk do të ketë më ecje spontane në grupime të ndryshme. Në ditën e 16 të lëvizjes flamingo, është krijuar rregullorja e marshimit, ku specifikohet se itinerari do të jetë vetëm brenda unazës. Alben Kola nga Kukësi zbuloi emrat e 3 nismëtarëve. Bashkë me të është dhe Luçiana Kokaj nga Rrjolli dhe Arlinda Lleshi nga Lezha, si iniciuesit e protestës, që kanë marr lejen e Policisë së Shtetit. Që gjatë grumbullimit në sheshin Skënderbej, Alben Kola i doli zot marshimit, si masë për të shmangur përsëritjen e incidentit të një nate më parë, që i çoi në bllokimin e autostradës Tiranë-Durrës e deri në Rinas. Teksa bëri thirrje për të mos rënë pre e tentativave për përçarje. Rruga drejt Kryeministrisë e fjalimet në bulevardin “Dëshmorët e Kombit” i kushtuan një vëmendje të veçantë studentëve. Ndërsa në fjalët e rastësishme pati një ftesë për ambasadorët që t’i bashkoheshin protestës. Duke kërkuar përmbysjen e klasës politike me dorëheqjen e qeverisë, pati akuza edhe për kërcënime nga opozita. Pas mesazheve para Kryeministrisë, qytetarët marshuan të bashkuar në rrugët kryesore të kryeqytetit. Mes thirrjeve për largimin e gjithë klasës politike dhe këngëve patriotike, qytetarët u rikthyen te sheshi Skënderbej dhe godina qeveritare me të njëjtin mesazh. Nuk munguan edhe thirrjet ndaj të gjithë qytetarëve, që të bashkohen në protestë.