Ish-zëvendëspresidentja amerikane Kamala Harris ka publikuar detaje të pazakonta dhe tronditëse në librin e saj të ri, “107 Ditë”, i cili pritet të dalë në treg javën e ardhshme. Në këtë rrëfim personal dhe politik, Harris rrëfen tensionet e mëdha me presidentin Joe Biden, momente zhgënjimi, si dhe përballje të ashpra me paragjykime gjatë fushatës presidenciale. Një nga momentet më të forta është ai kur Harris përshkruan një telefonatë të papritur nga presidenti Biden, vetëm pak orë para debatit vendimtar me Donald Trump. Biden i thotë se disa figura të fuqishme në Filadelfia nuk do ta mbështesin për shkak të komenteve të saj kritike në të kaluarën. Harris rrëfen se ndjeu zemërim të thellë dhe zhgënjim nga Biden, teksa përpiqej të ruante qetësinë përballë një momenti vendimtar politik. Bashkëshorti i saj, Doug Emhoff (Dag Emhof), u përpoq ta qetësonte dhe ta ndihmonte të përqendrohej në sfidën me Trump. Por tensionet nuk u ndalën aty. Harris kritikon edhe mënyrën si presidenti reagoi pas vendimit të Gjykatës Supreme për abortin, duke thënë se Biden pati vështirësi të shprehej me forcën që kërkonte momenti. Në një tjetër episod, gjatë një takimi në Shtëpinë e Bardhë më 4 korrik, zonja e parë Jill Biden ka pyetur drejtpërdrejt nëse “Harris dhe bashkëshorti i saj e mbështesin ende presidentin”. Në atë takim, Doug Emhoff shpërtheu duke thënë se “Harris ishte shpërfillur për vite me radhë dhe se tani kërkohej ndihma e saj, vetëm për arsye politike”. Harris zbulon gjithashtu se brenda ekipit të Bidenit kishte pakënaqësi edhe kur ajo shkëlqente publikisht, duke e parë suksesin e saj si një kërcënim për figurën e presidentit. Pas tërheqjes së Biden nga gara më 21 korrik, këshilltarët i sugjeruan Harris të distancohej prej tij, një moment që ajo e përshkruan si të vështirë emocionalisht.