“Luajmë për paqe” ishte fanella e autografuar nga Cristiano Ronaldo, që iu dhurua presidentit të SHBA Donald Trump nga kreu i Këshillit Europian, Antonio Kosta. “Oh më pëlqen kjo”, tha Trump gjatë takimit që pati me Kostën me rastin e Samitit të G7-ës. Por dhurata nga ylli portugez i futbollit me famë botërore nuk mjaftoi që shefi i Shtëpisë së Bardhë të zbusë qëndrimet e tij. Mediat ndërkombëtare raportuan se shefi i shtëpisë së bardhë po mendon që Shtetet e Bashkuara të sulmojnë Iranin, ndërsa marina amerikane ka ndihmuar ushtrinë izraelite të martën që të shkatërrojë disa raketa iraniane. Trump i kërkoi regjimit të Teheranit “që të dorëzohet pa kushte”. Të martën presidenti amerikan mblodhi Këshillin e Sigurisë Kombëtare, ndërsa nëpërmjet disa statuseve në rrjetet sociale deklaroi se “tashmë kanë nën kontroll qiellin e Teheranit”. “Ne e dimë edhe se ku fshihet lideri suprem, Khamenei. Ai është një shënjestër e lehtë. Ndihet i sigurt atje. Nuk kemi ndërmend ta vrasim. Për momentin...”, shtoi Trump. Ndërsa ministri izraelit i Mbrojtjes, Israel Katz, përshkroi Ajatollah Khamenein si një “diktator që mund të përfundojë si Sadam Husein”. Izraeli goditi objektiva kyçe në Teheran, duke vrarë gjeneralin Ali Shadmani, një nga figurat më të afërta ushtarake me udhëheqësin suprem iranian Ajatollah Khamenei, i cili kishte vetëm 4 ditë që ishte emëruar. Nga përplasjet e vazhdueshme në Iran janë shënuar 224 viktima dhe mbi 1800 të plagosur, ndërsa në Izrael 24 të vdekur dhe mbi 500 të plagosur.