Është rindezur sërish përplasja e Presidentit të SHBA, Donald Trump dhe ish aleatit të tij, miliarderit, Elon Musk. Mjaftoi një deklaratë e bosit të Teslës se në zgjedhjet paraprake do të mbështesë sfiduesit e projektligjit të shpenzimeve të kreut të shtetit që Trump të kalonte në kërcënime. Republikani nuk i priti mirë komentet e Muskut që i është kundërvënë projektligjit të tij të pagëzuar si “Big, beautiful bill””, e që tani e pohon hapur se mund të financojë rivalët e republikanëve që për ta goditur nismes që duhet të votohet në Kongres deri në 4 korrik. Trump reagoi duke i treguar manjatit se mund të heqë subvencionet qeveritare për firmat e tij. Kreu i Shtëpisë së Bardhë e quajti Muskun njeriun “më të subvencionuar në histori dhe sugjeroi në mënyrë shpotitëse, që Departamenti i Efikasitetit të Qeverisë (DOGE), të cilin vetë Musk e drejtoi deri muajin e kaluar, tani të rishikojë kontratat qeveritare të sipërmarrësit. “Elon Musk e dinte, shumë kohë para se të mbështeste fuqimisht kandidaturën time për President, se unë jam kategorikisht kundër përdorimit të detyrueshëm të automjeteve elektrike. Kjo është qesharake dhe ka qenë gjithmonë pjesë e fushatës sime. Nuk kam asgjë kundër makinave elektrike, por askush nuk duhet të detyrohet të zotërojë një të tillë”, shkroi presidenti në Truth Social. Sipas Trump, “pa subvencionet, Eloni ndoshta duhet të mbyllte biznesin dhe të kthehej në shtëpi në Afrikën e Jugut”. “Nuk do të kishte më lëshime raketash, satelitësh apo prodhim makinash elektrike dhe vendi ynë do të kursente një pasuri”, ishte mesazhi thumbues i tij.